Di Ragashanti World Tour a gwaan same way. Ragashanti Live broadcast fi four days from London, England … and di broadcasts dem slap weh!! Big up di England people dem weh tun up di ting! Latoya Lake, Keisha Bless (not the one fram Cali lol) Exstasy Queen an all England linky-linky, propa respek to all a unu. Nuff respek to Janet Bembow an Puss fi di crazy vibz weh dem rinse.
An mi haffi big up di lady weh rinse har very true mix-up weh she did a gi a man a swipe an it sweet di man soh much dat him jus tiff out an dead right inna di miggle a di ting!! Pupa Jeeeezas!! A real ting people, yeah. it all come eena di newspapers a England.
And, yes. she did come pon di broadcast an gi wi di full hundred pon di net. She did a rinse out a badadan act pon di dawg, an wen di sweetniss connect wid di general him staat tremble like wow. She say wen him staat tremble, she did tink a sweet it sweet him, soh she jus rev up di mout engine fi di betta.
Di whole a di dawg baddy staat rail up an a gwaan wid a bag a tings! An she jus tun it up fi di betta, crazy movements! Have bwoy unda propa mannas wid di tongue discipline. It reach di point weh di sweetniss fly up inna di boss head an him jus stiff out an naa move!
People yuh nuh know say a dead di dawg dead. even doe Ms lady mout did still full!! Mi cyaan bada enuh! An yuh nuh know say inna di broadcast mi ask har if wen him did dead if dat did dead too?? She say no. In fact, because dat neva dead she neva did even know say him dead. Caa hear wa, if a man have dat up deh soh, an a catty have him unda di good-up good-up treatment an den goh dead. di way how di human baddy work, dat a goh stay up deh fi a while. An das why she neva know say di dawg drop out long time an still did de deh a work har jaw cawna dem. Woooooiiieee!! She suck di life outa him!! Waaaaiiiieeee!!! Drap a grung! Laughing buck. Mi cyaan bada enuh. Cho!!
Hear wa all man haffi careful a da woman deh mout. Caa she wi BLOW your mind!! Kinova!! Har Hurricane Tongue an har Vacuum Troat a nuh nuttin naamal.
Anyway, mek mi done wid di almshouse. But big an serious doe mi ask har how she did feel wen she realise say a dead him did dead. She say even doe him neva did a move she still neva tink say him did dead. But wen it confirm say him did dead she did feel a way still. Naa lie doe. Di way how she free up an relax wen she did a tell it appears as if she get ova dat long time.
But me a wonda if because a wa happen she tun dung di energy pon har headas dem outa fear say she nuh waan kill no more man?? Mi jus a wonda.
Hear weh mi a say.if a woman hot like 10 fireside an waan gimmi a swipe, but den mi hear say she did swipe a man to death mi NAA TEK IT!! She can keep har Killa Mout! I will do widout. Nex ting yuh know she goh Tea-Bag mi an dry mi out. Noooo Sah!!
Big har up still.
Anyway, big up di TamFam weh roll out a di Tambourine Radio London Party. Wat a party sweet!! Mi say if di party sweet one more time, esi. Big up di DJ dem Supa Fridge and Noah di Yute wid di Powa. Unu deal wid di ting wicked.
Awright, a leggomentz time now. Sen mi unu mix-up dem at ragashanti@ragashanti.com. Bless up all TamFammers. Nuff love same way. See unu nex Thursday.
Road mi say!!
No comments:
Post a Comment